terça-feira, novembro 25

Ancuontro an Dues Eigreijas


Deimingo passado an Dues Eigreijas, hoube um ancuontro ourganizado pur l nuobo cura ,onde ajuntou todas las sues paróquias nal recinto de l'eigreija de Srª dal Monte. Fui ua fiesta cume num se bia an muitos anhos nal nuosso lhugar: el hoube chicha i sardinas assadas pra todos, el hoube belhós, uas buonas gaitadas, buona pinga i muito baile.
Quando se ampeçou a scapar l sol fui cume diç l'outro: "brasa, brasa cada um pra sue casa". Cum la barriga chena, las piernas desinferrujadas i ua risica nal canto de la boca la giente fui-se cum buntade de mais.






Restamos agradecer l cura por mos dar la ouportunidade de mostrar que an Dues Eigreijas tamien hai condiçones pra fazer destas fiestas.

sexta-feira, novembro 14

Hino de Dues Eigreijas

Ia uns tempos que este tema ie d'als mius favoritos, e siempre que oubia sabie que m'alhembraba algo mas num sabie al que era. Até que hoije oubi-lo mais ua vez e lougo bi que me era familiar, fai lhembrar dues eigreijas... Este bien poderia ser al nuosso hino....Num adianta....

quinta-feira, novembro 6

Tçtemunhos dals de fuora


Na staçon de camboio de Dues Eigreijas

Pula madrugada, apuis de miu pai ounhir la junta i la poner al carro cargado de sacos de trigo, fui-se a la mie cama i spertou-me.
- Bamos-mos, que hai muito camino a andar.
Sgodei ls uolhos para çpegar daqueilha sonheira morrinhenta tan saborosa para mi, que siempre me gustou drumir las madrugadas. La nuite staba frie por bias dua araige arrepassadica de baixo. Yá na rue, l cielo eili por riba de la mie cabeça manteniesse spargido de streilhas.
- Bamos al celheiro, tornou miu pai, s’acauso nun habisse oubido. Bás cumigo nun seia causo que me fagas falta para tocar las bacas.
Apuis de la sonheira spantada anté cuido que fui buono, yá habie tiempo que you nun miraba assi pa l Camino de Santiago. Anriba de ls sacos de granos quije cuntar las streilhas mas nun fui capaç, zisti i a meicamino, a la Cruç de Martinç Fernandeç, yá solo querie ancuntrar un cachico de cielo adonde cabisse mais ua.
Fui assi que ampeçou la mie purmeira ida al celheiro de la staçon de camboio de Dues Eigreijas. Adonde me dei cunta que ende, nun cabanhal, recolhien pa l Stado todo l grano que sobraba de la colheita.
Mas las nuobas nun íban a quedar porqui, mais balie que you habisse chapinado la cara, assi nun sbugalharie ls uolhos de tanto spanto. L sol, esse solo se lhebantou yá nós stábamos ancarreirados a las portaladas de l celheiro.
Eili bien arrimado als carreteiros andaba ua cousa negra, sudaba mais que un macho i bufaba cumo un bui quando s’anraiba. De barriga de cuba i ruodras de l tamanho de las de l nuosso carro puxadas por uns cambiços i atadas cun uns trasgueiros. Palantre i para trás de çofineira de chicharra, cumo quien nun se habie recolhido essa nuite, l chapéu de l chupon nun paraba queto anquanto de la chamineia salie ua nubre de fumo ambuolta de bafo, tapando las purmeiras raiadas ouferecidas nessa manhana pul criador.
Anton quedei a saber que aqueilho era la máquina de l camboio. Sien bacas nien béstias, nien burros pa la puxar. Alhá andaba eilha nun bou-me, bengo, toda ancarbonada cumo malhadores apuis dun die de frauga.
Ambaçbacado i tolhido assi quedei anté que aquel mostro negro asparcido a un scarabeilho gigante, agarrado a uas bagonetas, botou dous silbos i sues ruodras galopórun subre las lhinhas de fierro a caras al sul.
Se esta cousa era la máquina de l camboio, era bien defrente daqueilha que you coincie de ls lhibros de la scuola, i daqueilha que you zenhei i quelorei ne l cadernico de ls eisercícios. Essa acumparada a esta que staba çúzia, era guapa, de muitas quelores i cun dues bandeiricas na cara.
Nun quedei a gustar de camboios.
De buolta a casa, acunchegado ne ls sacos bazius i yá miu pai me fazie cumpanhie ne l tabrado, you dezie para mi! Inda bien que na mie tierra nun hai camboios. Íban a spantar ls perros, las pitas, ls parros, i l mais cierto nun iba a drumir las manhanas assossegado.
Un cachico apuis acunhei uolho.
Tube un suonho malo, que la máquina de l camboio se habie perdido alhá para baixo i nunca mais habie benido pa la staçon. Mas fui mentira que ls anhos apuis, alhá andaba eilha de l mesmo modo sien tirar nin poner.
I sien se lhabar.

Faustino Antão

http://www.jornalnordeste.com/noticia.asp?idEdicao=207&id=8810&idSeccao=1961&Action=noticia