Antes tarde que nunca!

Nun sei se ya bos diestes de cuonta mas de beç an quando damos ls parabenes ls nuossos lhoneiros que fazem ainhos. Puis cume hoube uns que se quedoran pul camino i num tubiran dreito a la fiesta ua beç que tubiram la suorte de nacer nal mês de las fiestas dal berano i cume mais bal tarde que nunca eiqui ls teneis:

An purmeiro Zé Carlos mais cunhecido por Zé Colmeia (ou Zé Bicas ya num sei) pra mi hade ser siempre Zé Carlicos:

Eiqui tenemos a Malagueta mais cunhecido por Tiago que deixou de ser teenager i passou la sue fiesta atarefado, cume pudeis ber:

Pra acabar, i desta beç sin anganhos, Andorinha(a la buossa squierda) que ya pude tirar la carta de cunduzir i que la nuite de la fiesta num lhargou la sue rosa ("A rosa é minha!" dizia ele):

Parabenes a todos i d'hoije an menos d'um ainho!

Las nuobas

Acaboran-se las bindimas, l cheiro a mosto que enche las rues ya desapareciu dando lhugar l cheiro a strume i a tierra lhabrada pa la semanteira; las castanhas ya pingam i, miesmo cun un berano de San Martino alhongado, ls chupones ya botan fumo, preparados pra mais uns mieses de trabalho i alimentados por uns buonos atrelhados de lheinha que, cume las furmigas, ls ban metendo onde calha. Las moscas, que ya le cheira a Inbierno, andan zapacientadas i azucrinan quien quier fazer pur a bida ou quien la bei passar l sol,...

Ie assi las nuobas nun son muitas i ainda bien, purque quando las hai ie, ou purque tie coisa fui pa l'hospital, ou purque ti coiso se caiu anfim l milhor ie que nun haiba nuobas. Chega-se a la concluson que las buonas nuobas apareçan mui de quando an quando i se num m'anganho l'última fui an Angosto quando naciu la garotica de Anabela. I purquei? Num hai giente que faga garotos?Ou só nun hai giente ?Ou la giente que hai , stan tan aquemodadas , que acham que aquilho ie assi i assi será?

La berdade ie que las nuobas que se correm son las malas nuobas, las buonas nistante se squecem...

Restamos pansar, anquanto roemos uns belhozicos, nas Fiestas dal Natal i eimaginar ls grupos que ban animar las nuites, ua beç que ls murdomos ainda nun se çcobriram...

La lhengua na TV

Mais ua beç se falou de la lhengua na TV... Palabras para quei! Hai que tener ourgulho!




http://videos.sapo.pt/vh8p9tzDthSMk3BULRQ6

L barco de Dues Eigreijas

Agora que alguas bozes mos descansaram l spíritos reboltados cula degradação de la Estação(parece que ban a pegar naquilho), lhembrei-me de bos lhembrar outra de las marabilhas que stá prestes a ruir, la Casa dal Cura, no cum un retrato dal eidificio mas si cun este, que na mi oupenion ie algo raro, belo, único i aposto um saco de batatas cume hai giente an Dues Eigreijas que nunca reparou.

Ya hoube bouna giente que fizo de todo pra qu' l nousso lhugar pudesse tener de buolta un dals mais ampurtantes monumentos dal praino mas quien manda manda, i se mos aquemodamos ie l que se bei...

Deixo eiqui un desafio: quien souber stórias, ourigens, datas sobre esta nossa marabilha que scriba nals cumantários, cume por eixemplo l significado deste muro an forma de barco.Hai quien num saiba, nin que sei ls de fuora...

L salto de Zé da Quinta!

I pra que bos baiades anterteniendo deixo-bos culs nossos Pauliteiros, an Miranda na feira dal artesanato deste ainho,cuns saltos, no dal nousso Andorinha faborito, mas dal aspirante a saltador, Zé da Quinta, çculpai-me se m'anganhei mas la crista deixou-me algo confusa, son todos de la miesma spécie. Cume podeis ber até parece que tien asas, cun salto daqueilhes...!

Num ie qualquiera grupo que tien tanto paixarico guapo pra saltar l castielho.. Hai que ber!

Obrigado a Ana Rita que mos mandou este filme i ya sabeis se tubirdes destas reliquias an casa mandai-mos-as i num precisam de ser ls pauliteiros... que seia nal praiano stá bouno...

http://videos.sapo.pt/1zDpPuhMd7U53sF1cuSl

El hai cousas...!

Andaba you a nabegar nas anternetes i olhai a quien habia d'ancuntrar, Urbano nal sou melhor... L retrato, cul título "Admirando", fui tirado por um rapaç que se chama Nuno moreira...

I pansais bós "Que staria Urbano a admirar?"

El hai cousas...

Pra quien stá a pansar "mas quien será l tiu?": Urbano ie daqueilhas personages que todos ls lhugares tenan i que seran recordadas por muitos i por muito tiempo (corregi-me se digo mentiras).

Quien quejir cunfirmar que num fui you la fetografa ide eiqui :
http://olhares.aeiou.pt/admirando/foto1394151.html

Resumé de las fiestas!

Cumo mais bal tarde que nunca deixamos eiqui un cachico dal que se passou nas fiestas de Nossa Srª dal Monte:

Nal die dals petiscos, a seguir a la nobena, la giente ajuntou-se e marabilhou-se cul rancho de Dues Eigreijas que, num sei se fui dals aires dal Alentejo, bailoran cume hai muito tiempo num ls biamos a beilar i mais uã beç Luizico ajudou a la fiesta puis fizo la sue melhor actuaçon de la sue longa carreira de Pauliteiro. L melhor de la fiesta passou-se depuis de ancher la barriga de caracols i cacholas an que l mui nobre grupo "La charracolete" cantou e ancantou ls muitos fãs que beniran a belas..

Nal, tão sperado, die 14 iba la giente cun buntade de rumper las solas mas l Diapasão num stube a la altura dals bounos bielhos tiempos an que animaban la giente i fouran-se pra casa culs cantares de la segada..

Nal die 15, i cume este berano num stá pra brincadeiras, la santa bino a la rue e fizo queston de mos benzer bien benzidos cula auga de la chuba. Cume dizian l mais bielhos "Bah ya podemos dezir que hoube un 15 de Agosto an que se fartou de chober ". Mas se pansais que las mini jupes i ls decotes num saliran dal almario stais bein anganhados purque cume num poderie deixar de ser las moças de la tierra probaran mais uã beç que an Dues Eigreijas la giente smera-se quando toca a fazer garotas (i garotos tamien bah).

Ah l'eigreija staba (i esta fui la frase mais dita antre ls apreciadores) "um sonho"...

A la nuite miesmo cul friu que staba stube bien animada antre rifas, "cunxunto", las moças dal cunjunto, ls bailes i l fougo de artificio cheguemos l fim bien cuntentos i mais uã beç dezimos "OH YA S'ACABOU!"...

I assi se passou mais un 15 d'Agosto, pal'ainho hai mais se Dius quezir. Amen Jasus

Ya cheira a fiesta!

Cume ya débeis de tener nutado andamos algo çtraídos i las besitas l Lhonas num tenan sido muitas, por un lhado purque nien toda la giente tien anternaite an casa (l que nun ie çculpa uã beç que la junta tien alha un cumputador (cun moço bien guapo) pra quien quejir nabegar) i por outro lhado ya cheira a fiesta.

Ls murdomos ya ancheran las rues de bandeirolas, anté puniran las buonas fiestas dal natal pra ber se la giente se anima, las murdomas ya ampeçan a dezir que num quieran beilar purque le dolan las piernas, l bar de Nº Sra dal Monte ya abriu i anfim las matriculas amarilhas nun anganan a naide. Restamos pansar nals farrapos que bamos a strear nal die quinze e deixamos eiquei alguas sugestones prals mais indecisos…

L retratos fuoran tirados l'ainho passado mas a pansar na fiesta deste ainho, ls modelos fouran scolhidos a dedo i até pa la praia fouran a fazer la sesson fotográfica..

Las 7 Marablihas de Dues Eigreijas

Stan ancerradas las botaçones de las 7 Marabilhas de Dues Eigreijas ls ganhadores son:

- Ls pauliteiros

- La estaçon dal camboio

- La eigreija de S. dal Monte

- La casa dal cura

- La eigreija de S. Eufémia

- Lhagona de la Bichas

- La fraga de la Solhapa

Fustes bós que scolhestes agora num hai que resmungar, tubissedes botado... Restamos pansar na fiesta de la Marabilhas... E pauliteiros num bos squeçades dal que prometestes...

"L Berano nal Praino"

Ya botestes nas marabilhas? Ainda no? Atão que stais a spera? aprobeitai agora purque bamos encerrar las botaçones dia 1 d'Agosto... Ainda stais an tiempo de scolher las que bos pansais ser las 7Marabilhas de Dues Eigreijas. (podeis botar an siete)

Pra que depois tengades algo an que botar bamos a abrir un "concurso de fotografia" que se bai a chamar "L Berano nal Praino". Neste concurso bai a poder partecipar toda la giente que quejir, basta que mos mande un ou dous retratos tirados nal praino durante ls meses de berano i pude ser de retratos de paisages, personas, animals, fiestas,romarias, procissones, todo junto ou l que bos antenterdes, tien ie que passar la eideia de un Berano nal praino... Ls premios ainda stan a ser scutidos mas ban a ser por barias categorias. Quien quejir ampeçar pude mandar l retrato debidamente eidentificado para dues.eigreijas@gmail.com.

Quedai atentos a mais noubas que num ban a tardar i ya sabeis: siempre cul tira retratos a mano!