Na staçon de camboio de Dues Eigreijas
Pula madrugada, apuis de miu pai ounhir la junta i la poner al carro cargado de sacos de trigo, fui-se a la mie cama i spertou-me.
- Bamos-mos, que hai muito camino a andar.
Sgodei ls uolhos para çpegar daqueilha sonheira morrinhenta tan saborosa para mi, que siempre me gustou drumir las madrugadas. La nuite staba frie por bias dua araige arrepassadica de baixo. Yá na rue, l cielo eili por riba de la mie cabeça manteniesse spargido de streilhas.
- Bamos al celheiro, tornou miu pai, s’acauso nun habisse oubido. Bás cumigo nun seia causo que me fagas falta para tocar las bacas.
Apuis de la sonheira spantada anté cuido que fui buono, yá habie tiempo que you nun miraba assi pa l Camino de Santiago. Anriba de ls sacos de granos quije cuntar las streilhas mas nun fui capaç, zisti i a meicamino, a la Cruç de Martinç Fernandeç, yá solo querie ancuntrar un cachico de cielo adonde cabisse mais ua.
Fui assi que ampeçou la mie purmeira ida al celheiro de la staçon de camboio de Dues Eigreijas. Adonde me dei cunta que ende, nun cabanhal, recolhien pa l Stado todo l grano que sobraba de la colheita.
Mas las nuobas nun íban a quedar porqui, mais balie que you habisse chapinado la cara, assi nun sbugalharie ls uolhos de tanto spanto. L sol, esse solo se lhebantou yá nós stábamos ancarreirados a las portaladas de l celheiro.
Eili bien arrimado als carreteiros andaba ua cousa negra, sudaba mais que un macho i bufaba cumo un bui quando s’anraiba. De barriga de cuba i ruodras de l tamanho de las de l nuosso carro puxadas por uns cambiços i atadas cun uns trasgueiros. Palantre i para trás de çofineira de chicharra, cumo quien nun se habie recolhido essa nuite, l chapéu de l chupon nun paraba queto anquanto de la chamineia salie ua nubre de fumo ambuolta de bafo, tapando las purmeiras raiadas ouferecidas nessa manhana pul criador.
Anton quedei a saber que aqueilho era la máquina de l camboio. Sien bacas nien béstias, nien burros pa la puxar. Alhá andaba eilha nun bou-me, bengo, toda ancarbonada cumo malhadores apuis dun die de frauga.
Ambaçbacado i tolhido assi quedei anté que aquel mostro negro asparcido a un scarabeilho gigante, agarrado a uas bagonetas, botou dous silbos i sues ruodras galopórun subre las lhinhas de fierro a caras al sul.
Se esta cousa era la máquina de l camboio, era bien defrente daqueilha que you coincie de ls lhibros de la scuola, i daqueilha que you zenhei i quelorei ne l cadernico de ls eisercícios. Essa acumparada a esta que staba çúzia, era guapa, de muitas quelores i cun dues bandeiricas na cara.
Nun quedei a gustar de camboios.
De buolta a casa, acunchegado ne ls sacos bazius i yá miu pai me fazie cumpanhie ne l tabrado, you dezie para mi! Inda bien que na mie tierra nun hai camboios. Íban a spantar ls perros, las pitas, ls parros, i l mais cierto nun iba a drumir las manhanas assossegado.
Un cachico apuis acunhei uolho.
Tube un suonho malo, que la máquina de l camboio se habie perdido alhá para baixo i nunca mais habie benido pa la staçon. Mas fui mentira que ls anhos apuis, alhá andaba eilha de l mesmo modo sien tirar nin poner.
I sien se lhabar.
Faustino Antão
http://www.jornalnordeste.com/noticia.asp?idEdicao=207&id=8810&idSeccao=1961&Action=noticia
