L CERVAS an Dues Eigreijas

Biba Mocidade!

Cumo yá todos sabeis, l praino mirandés ye ua tierra mi rica quando se fala an todo l que ye natural. I ye eiqui que se puoden ber alguns animales que nun hai an mais sítio ningun i por isso hai muita giente que ben de mui loinge para tener l prebileijo de ber esses bichicos, nien que seia só de loinge.

Soutordie, dous desses animales fúron ancuntrados algo malicos an tierras de Cérceno i Dues Eigreijas i las pessonas que ls ancuntrórun tubírun la buona buntade de chamar la guarda ou ls de l parque para que ls beníssen a busca-los. Eilhes benírun i fúrun lhebados pa l spital de ls animals selbaiges an la Sierra de la Streilha, CERVAS.

Las nuobas que bos trago son buonas, ls animales, un Alcaforro de l Eigito i ua Cruja de las Torres, stán de buona salude, listos pra outra bida nuoba i na sesta que ben, die 30 de Julho, chégan de la Sierra para finalmente séren lhibertados an sues casas.

De maneira que stais todos cumbidados para ber las lhibertaçones i deixobos eiqui l programa:

Die 30 julho:

12h - Cérceno - Santa Marina: Lhibertaçon de un Alcaforro de l Eigito
Ponto de ancontro: Associaçon de Cérceno

20h15 - Dues eigreijas: Lhibertaçon de ua Cruja de las Torres
Ponto de ancontro: Junta de Freguesie de Dues Eigrejas

Aparecei todos, quantos mais furdes melhor i nun pérdadas esta ouportunidade rala!