Subre un retrato de ls anhos 30
Éran, bendo bien, lhabradores
esses trinta i nuobe rostros cinzelados pul tiempo
dua risa, ou un trejeito delantre la súpeta
claridade. Ne ls paredones de las peinhas amuntona-se
essa giente abiessa a la lhuç, benida de ls sanjones
de l bolfrámio, cumo se d’aperpósito
para que hoije ls podíramos mirar
anquanto muortos.
Mas este caos ye eilusório, ua scura orde
arrepassa-le la lhuç de ls uolhos.
Demais sabien eilhes que la muorte spreitaba
puls pulmones de la fame, pul degredo de las
trebas. Mas morrer por morrer antes de puolo,
que ls filhos a la falta de pan.
De antre esses trinta i nuobe rostros puostos
an scaleiras puls uossos de la cantarie, un
stá na purmeira fileira, bien al centro,
perbileijos de mulhier i de la belheç. Lhenço
negro acubrindo la cabeça i atado ne l cachaço
cumo quien nun quier l sol ne l lhuito dua filha
eilhi mesmo muorta. Anton, fuora de tiempo,
eilha agarrou la sue praça na fileira de l scuro:
las angúrrias fondas, ls boucielhos lebes de la tristeza,
las manos caídas anriba l regaço susténen
la canseira fuora de tiempo i ls anhos agres
bibidos al bafo benenoso de las guerras.
L rostro que salbo desta foia anónima
i de quien deixo eiqui este retrato
ye de tie Jouquina, mie bisabó,
que solo conheço na eiternidade deste sfergante,
mas ye cumo se siempre moráramos
ambaixo la mesma teilha.
Fernando de Castro Branco, O Nome dos Mortos.
puosto an mirandés por Fracisco Niebro
Sem comentários:
Enviar um comentário